Tume ya Uchaguzi ya Zanzibar (ZEC) imewataka mawakala ambao watashiriki katika zoezi la uhakiki na uwandikishaji wa daftari la wapiga kura kutumia vizuri nafasi yao katika kuelimisha wananchi wenye sifa kujitokeza kwa wingi katika vituo vya kuandikisha ili waweze kujiandikisha na kuhakiki tarifa zao.
Wito huwo umetolewa na Msimamizi wa Uchaguzi Wilaya ya Wete Tume ya Uchaguzi ya Zanzibar (ZEC) Omar Zuber Mbwana wakati akifungua mafunzo elekezi kwa mawakala wa uandikishaji huko katika ukumbi wa skuli ya Sekondari Chasasa Wilaya ya Wete.
Ndugu Omar amesema iwapo mawakala hao watafuata taratibu za mafunzo waliyopatiwa kwa mujibu wa sheria ya Uchaguzi na Kanuni za Uandikishaji itasaidia kuwapatia haki wananchi wenye sifa za kuandikishwa katika Daftari la Kudumu la Wapiga Kura
Kwa upande wake , Mkuu wa Kurugenzi ya elimu ya wapiga kura, habari na uhusiano, Juma Sadifu Sheha, amesema mwananchi ambaye atapingwa na mkuu wa kituo cha uandikishaji atapaswa kuchukua fomu maalumu kwa mujibu wa sheria ya uchaguzi Nam. 4 ya mwaka 2018, ili kuwasilisha malalamiko yake kwa Msimamizi wa Uchaguzi wa Wilaya husika.
Akiwasilisha mada katika mafunzo hayo Afisa Uchaguzi Wilaya ya Wete ISSA JUMA HAMADI amewasisitiza mawakala hao kwamba Tume ya Uchaguzi katika zoezi hili la uandikishaji na uhakiki wa taarifa za Wapiga Kura itatumia kitambulisho kipya cha Mzanzibar Mkaazi kilichotolewa na Wakala wa usajili wa matukio ya kijamii Zanzibar.
Kwa upande wao washriki wa mafunzo hayo, Wameishukuru Tume ya uchaguzi ya Zanzibar kwa kuandaa utaratibu mzuri wa Uandikishaji na kuwaomba wananchi kuitumia fursa ya kujiandikisha na kuhakiki taarifa zao ili waweze kupiga kura katika uchaguzi Mkuu wa mwaka 2020.
